ചത്തും കൊന്നുമുള്ള
പ്രയാണത്തിനിടയില്‍
മനുഷ്യര്‍
ജീവിക്കുന്ന വേള
എത്ര തുച്‌ഛം !
***
ഒഴുക്കുണ്ടെങ്കില്‍
അതിനൊത്തൊഴുകാം
അല്ലെങ്കില്‍
എതിരെയാകാം
ഒഴുക്കുമില്ലാതെ വന്നാല്‍
എന്തു ഗതി?
അഴുക്കാവുക തന്നെ.
***
ചില വേളകളില്‍
ആടിന്റേയും
പിന്നെ നായയുടേതും
മറ്റു ചിലപ്പോള്‍
ഓന്തിന്റേയും
ഇനിയും ചിലപ്പോള്‍
ആനയുടേയും
അങ്ങനെ
വിവിധ മൃഗജീവിതം
ജീവിക്കുന്നതിനിടയില്‍
വല്ലപ്പോഴുമാണ്
നാം
മനുഷ്യജീവിതം
നയിക്കുന്നത് !
***
കണ്ണടച്ചു
വിശ്വസിക്കുമ്പോള്‍
അന്ധവിശ്വാസമാവുക
സ്വാഭാവികം !
***
ഇരട്ടമുഖമുള്ളവന്
നാലു കൈയും
നാലു കാലും
ഉണ്ടാവണമെന്നില്ല.
***
ഭാഷ
ലളിതമാക്കുക
എന്നത്
വളരെ
പുരോഗമനപരമായ
രാഷ്‌ട്രീയ പ്രവര്‍ത്തനമാണ്.
***
ദന്തഗോപുരവാസിയാകാള്‍
ദന്തഗോപുരം വേണമെന്നില്ല
വാതിലും ജനലുമടച്ച
സ്വന്തം മുറി
ധാരാളമാണ്.
***
വൈരുദ്ധ്യവാദത്തിന്
ഏറ്റവും വിരുദ്ധമായത്
അത് പ്രയോഗിക്കാതിരിക്കലാണ്.
***
നഗരത്തെ
ഗര്‍ഭം ധരിച്ച
ഗ്രാമങ്ങളാണ്
കേരളത്തിലേറെയും.
***
മിന്നുന്ന പൊന്നിനോ
മിന്നാത്ത പൊന്നിനോ
മാറ്റു കൂടുതല്‍?
***
പരാജയത്തിനു മാത്രമല്ല
ജയത്തിനും അതീതമാവുകയാണ്
സ്‌പോന്‍ട്ട്‌സ്‌മാന്‍ സ്‌പിരിറ്റ്.
***
അവസരത്തിനൊത്ത്
ഉയരുന്നതല്ല
താഴുന്നതാണ്
അവസരവാദം.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ